Aktorja e njohur Kate Hudson ka surprizuar me një deklaratë ndryshe nga sa jemi mësuar të dëgjojmë në Hollywood, duke treguar hapur se është plotësisht në paqe me kalimin e viteve madje e shijon atë.
E ftuar në emisionin The Tonight Show Starring Jimmy Fallon, ku u intervistua nga Jimmy Fallon, aktorja foli për ditëlindjen e saj të fundit, të cilën e festoi më 19 prill. Teksa moderatori e uroi për 47-vjetorin, Hudson reagoi me humor duke thënë: “Faleminderit. Jam shumë e moshuar.”
Megjithatë, ajo e sqaroi menjëherë se kjo nuk ishte aspak një ankesë apo zhgënjim. Përkundrazi, aktorja u shpreh se është shumë e lumtur me moshën dhe mënyrën si po evoluon në jetë. “Jo, më pëlqen. Më pëlqen të plakem. Mendoj vërtet se do të bëhem një plakë e shkëlqyer,” tha ajo me sinqeritet.
Hudson shtoi se me kalimin e viteve vjen edhe një lloj qetësie dhe lirimi nga presioni: “Sepse bëhet gjithnjë e më mirë. Nuk ke pse të shqetësohesh më aq shumë për gjëra që më parë të rëndonin,” u shpreh ajo, duke reflektuar mbi përvojën dhe pjekurinë që sjell mosha.
Deklarata e saj është pritur pozitivisht nga fansat, pasi vjen si një mesazh i fortë për pranimin e vetes dhe për të sfiduar standardet e zakonshme të industrisë së showbiz-it, ku rinia shpesh shihet si kriter kryesor.
Sa i përket festimit të ditëlindjes, aktorja zgjodhi një qasje më intime dhe të qetë. Ajo tregoi se e kaloi këtë ditë speciale në një ambient të relaksuar, në shoqërinë e familjes dhe miqve të saj më të afërt, duke shmangur festat e mëdha dhe duke preferuar një atmosferë më personale dhe të ngrohtë.
