Katy Perry ka folur hapur për arsyen pse për vite me radhë zgjodhi të fshihte emrin e saj të vërtetë dhe të ndërtonte identitetin artistik me të cilin u bë e famshme në mbarë botën.
Artistja, emri i vërtetë i së cilës është Katheryn Elizabeth Hudson, ka treguar se krijimi i figurës së “Katy Perry” nuk lidhej vetëm me karrierën muzikore, por edhe me nevojën për t’u shkëputur nga e kaluara dhe nga një fëmijëri e vështirë.
Në një intervistë të mëparshme për The Guardian, ajo rrëfeu se u rrit në një familje tepër fetare, pasi të dy prindërit e saj ishin pastorë pentekostalë. Sipas këngëtares, kjo periudhë e jetës e bëri të ndiente dëshirën për të “ikur” dhe për të krijuar një version tjetër të vetes.
“Shumë njerëz jetojnë me frikë për shkak të diçkaje që u ka ndodhur në fëmijëri, ose për shkak të një forme të PTSD-së që e kanë përjetuar gjatë jetës”, është shprehur ajo.
Këngëtarja shtoi se personazhi “Katy Perry” u krijua si një lloj mburoje emocionale. “Prandaj krijova këtë personazh të mrekullueshëm, Katy Perry, që në masë të madhe jam unë dhe ku mund të futem gjithmonë. Por e krijova për të mbrojtur veten”, tha artistja.
Ajo pranoi gjithashtu se kishte frikë nga mënyra se si publiku mund ta perceptonte nëse do të prezantohej si Katheryn Hudson. “Nuk doja të isha Katheryn Hudson. E urreja atë emër, më dukej shumë i frikshëm, prandaj vendosa të bëhesha dikush tjetër”, deklaroi Perry.
Ndërkohë, partneri i saj, Orlando Bloom, tërhoqi vëmendje gjatë ceremonisë së VMAs 2024, kur e prezantoi këngëtaren me emrin e saj të vërtetë teksa ajo mori çmimin MTV Video Vanguard Award.
