Përplasja institucionale mes kryebashkiakes Zamira Rami dhe prefektit Astrit Aliaj duket se vazhdon. Të paktën këtë të lë të kuptosh mungesa e saj në dy takimet e fundit publike për situatën emergjente në lagjen ‘Kodra e Shtufit’. Rami nuk ishte sonte te pallati ku nisi të pastrohej balta nga mjetet e emergjencave. Prefekti Astrit Aliaj u shfaq vetëm me deputetin Flamur Golemi dhe Vangjel Muçon si përfaqësues i bashkisë. Kryebashkiakja nuk kishte shkuar gjithashtu as në mbledhjen e shtabit të emergjencave tre netë më parë. Ajo kishte dërguar sërish nënkryetarin Muço. Ndryshe nga emergjenca në pallatin e lagjes ‘Punëtori’, ku Zamira Rami ia bëri vetë të ditur banorëve raportin e gjeologëve, sonte te ‘Kodra e Shtufit’ këtë e bëri prefekti.
Sigurisht që nuk është rastësi mungesa e saj sonte në mbrëmje dhe as në mbledhjen e shtabit të emergjencave. Me siguri ajo refuzon të dalë publikisht krah një personi, i cili i ka kërkuar asaj dorëheqjen në rast se nuk e menaxhon dot situatën. Prefekti Astrit Aliaj u ka thënë banorëve të pallatit te ‘Kodra e Shtufit’ se kryebashkiakja duhet të dorëhiqet po qe se nuk i del për zot kësaj katastrofe. Ngjarja është treguar për mediat nga vetë banorët. Zamira Rami, ndoshta këtu me të drejtë, nuk e ka duruar dot këtë kërkesë që në tre vite si kryebashkiake s’kishte guxuar t’ja bënte askush.
Kjo që prefekti u tha banorëve, ishte një lloj poshtërimi për të dhe për autoritetin e saj si e zgjedhur me votë nga qytetarët. Këtë autoritet ajo nuk lejon t’a sfidojë një njeri i emëruar politikisht, sikundër është prefekti Astrit Aliaj. Prandaj ajo ka zgjedhur të dërgojë sërish Vangjel Muçon te ‘Kodra e Shtufit’. Nga ana tjetër Zamira Rami tregoi se i përmbahet kërkesës së saj drejtuar qeverisë shqiptare për të shpallur gjendjen e emergjencës së pjesshme në Bashkinë Gjirokastër, kërkesë e cila ende nuk ka marrë përgjigje zyrtare, por siç duket s’ka për t’u aprovuar. Kjo e shton më tej inatin e saj karshi prefektit dhe qeverisë, ndonëse nuk është shprehur publikisht dhe me gjasë nuk do të flasë fare. Përtej të gjithave sa kanë ndodhur, Zamira Rami është vetëm ‘viktimë’ në këto emergjenca njëra pas tjetrës që po përjeton Gjirokastra. Ajo thjesht duhet të përballet me kusuret që s’janë të qeverisjes së saj.
©ArgjiroLajm.net
