Kjo situatë nuk ndodh vetëm në Formula 1. Edhe në futboll, kur ndryshohen rregullat e arbitrimit, rrallëherë pyeten lojtarët për mendimin e tyre. Vendimet shpesh merren nga njerëz që nuk kanë qenë kurrë pjesë aktive e lojës.
E njëjta gjë duket se po ndodh edhe në Formula 1, ku pilotët nuk janë të gatshëm të heshtin përballë një rregulloreje që nuk u pëlqen, i detyron të bëjnë manovra të panatyrshme gjatë kualifikimeve dhe garës dhe, më e rëndësishmja, është treguar tashmë si e rrezikshme. Karlos Sainz ishte i pari që ngriti alarmin, por të tjerë si Luis Hamilton i janë bashkuar dhe kërkojnë ndryshime. Jo vetëm në rregullore, por edhe në mënyrën se si funksionon i gjithë sistemi.
I pyetur për vizionin e tij mbi përmirësimin e Formulës 1 aktuale, Hamilton u shpreh mjaft skeptik: “Ne pilotët nuk kemi as zë, as votë. Nuk kemi fuqi. Nuk jemi pjesë e komitetit, nuk kemi të drejtë vote”, tha ai, me një ton të ngritur, por duke përshkruar realitetin. Sipas tij, pilotët duhet të dëgjohen si zëra autoritarë dhe si ata që rrezikojnë jetën e tyre me shpejtësi mbi 300 km/h. Hamilton nuk kërkon vetëm rregullime apo simulime nga FIA, por kërkon që pilotët të kenë rol aktiv në vendimmarrje, ashtu si palët e tjera të përfshira, të cilat shpesh kanë një perceptim më të largët nga ajo që ndodh realisht në pistë.
