Kuvendi ankimon në KAS (Komisioni i Ankimimeve dhe Sanksioneve) vendimin e KQZ-së për bllokimin e nismës së “Paketës së Maleve” dhe pr. ligjin për TVSH në Bujqësi.
Komisioni Qendror Zgjedhor i kërkoi Kuvendit të mos i miratojë 2 projektligjet pasi mund të ndikojnë në elektorat para zgjedhjeve të 11 majit. Ishte kreu i KQZ-së, Ilirjan Celibashi ai i cili tha se ka konstatuar se miratimi i dy projektligjeve mund të ndikojë në elektorat.
“Ky vendim bazohet në parimin e neutralitetit të institucioneve shtetërore gjatë periudhave zgjedhore, me synimin për të shmangur çdo ndikim të mundshëm mbi elektoratin përmes ndryshimeve në politikat fiskale apo ekonomike. Në këtë kontekst, miratimi i këtyre projektligjeve, të cilat prekin politika të rëndësishme fiskale, mund të krijojë perceptimin e përdorimit të mjeteve ligjore për qëllime elektorale. Për këtë arsye, i kërkoj Kuvendit të Shqipërisë të mos i shqyrtojë këto dy projektligje në seancë plenare”,- deklaroi Celibashi.
Por, socialistët pretendojnë të kundërtën dhe kërkojnë nga KAS shfuqizimin e këtij vendimi dhe lejimin e vijimit të procedurave parlamentare për shqyrtimin dhe miratimin e projekt-ligjeve në fjalë pa kufizime të pajustifikuara.
