Një vajzë e re është vrarë me armë zjarri në hyrjen e jashtme të Fakultetit të Mjekësisë, pranë spitalit “Nënë Tereza”.
Informacionet policore thonë se ka qenë një djalë i ri, i cili qëlloi me armë vajzën dhe më pas qëlloi edhe veten, por mbeti i plagosur dhe ndodhet në gjendje të rëndë.
Sipas dëshmitarëve në vendngjarje, vajza ka qenë me një shoqen e saj në momentin kur përpara i doli autori, me të cilin dyshohet se ka qenë në një lidhje.
Pasi e mori veçmas, djali e hodhi përtokë dhe e qëlloi me armë duke i shkaktuar vdekjen e menjëhershme. Më pas, drejtoi armën edhe drejt vetes, por ka mbetur i plagosur. Nuk dihet identiteti i viktimës dhe as i të plagosurit.
Në vendngjarje kanë shkuar forca të shumta policie dhe kanë nisur hetimet për këtë ngjarje të rëndë.
Vajza që u ekzekutua ditën e sotme në Tiranë quhej Arjela Murati, 21 vjeç nga Berati. Djali që e qëlloi për vdekje quhet Aldo Beluli, 23 vjeç nga Fieri. Ky i fundit qëlloi edhe veten në kokë dhe për momentin është i shtruar në spital në gjendje të rëndë për jetën. Dyshohet se ky i fundit e përndiqte 21-vjeçaren prej kohësh
