Kryetarja e LSI-së, Monika Kryemadhi thotë se kur të vijnë në qeveri do të realizojnë një reformë tërësore në arsim. Sipas saj, programi i LSI bazohet mbi këtë themel solid që përgatit qytetarë të mirë, profesionistë që kanë besim tek Shqipëria dhe tek e ardhmja e saj. Kryemadhi shprehet se investimi më i rëndësishëm që mund të bëjë shoqëria për të sotmen dhe të ardhmen, është investimi në arsim.
“Shqiptarët, veçanërisht të rinjtë përballen me shumë sfida të mëdha. Papunësinë, koston e jetesës, shpopullimin e vendit, integrimin në Evropë.
Një sistem arsimor cilësor që prodhon profesionistë dhe jo kartona diplomash është zgjidhja e vetme për të garantuar punësim të mirëpaguar dhe për të krijuar besimin se e ardhmja është këtu në Shqipëri, për të përgatitur qytetarë të denjë europiane. Prandaj ne do të realizojmë një reformë tërësore në arsim, duke paguar në mënyrë dinjitoze mësuesit tanë, duke e lidhur shkollën me prodhimin, biznesin dhe tregun e punës.
Ne do të mbështesim realisht arsimin me 5% të PPB, do të vendosim taksën e të ardhmes në 1% të fitimit të 200 kompanive të mëdha. Ne do të masivizojmë programin mëso dhe fito që profesionistët e rinj të punojnë dhe fitojnë pranë biznesit ndërsa mësojnë në shkollë. Ne do të investojmë në kërkimin shkencor dhe inovacionin, që të rinjtë tanë të tregojnë talentet e tyre dhe që shoqëria dhe ekonomia jonë të konkurrojë me fqinjët dhe botë”, tha Kryemadhi.