Për bardheblutë ish- ”Qemal Stafa” vjet ishte “mollë e ndaluar”… Në fakt, kjo mungesë në kryeqytet u vu re edhe në rezultate dhe tifozët e paktë në stadium, si dhe zerimi i parave nga arkëtimet prej biletave.
Duhet ta pranojmë se Tirana është skuadra që është dëmtuar më shumë këtë sezon nga mungesa e tifozëve. Nëse bardheblutë do të luanin në kryeqytet, do të kishin arkëtuar minimalisht 200 milionë lekë të vjetër nga ndeshjet brenda, por kjo shumë nuk u bë asnjëherë.
Në çdo javë u vu re mungesa e përkrahësve, të cilët janë jo vetëm ata që mbajnë gjallë shpirtin bardheblu, por imputojnë edhe para në arkat e klubit, falë qenësisë në stadium. Bardheblutë, duke mos llogaritur ndeshjet e Europës, jashtë kryeqytetit kanë luajtur 27 takime mes kampionatit, “play out”-it dhe Kupës së Shqipërisë. Kjo do të thotë se kanë udhëtuar rreth 4190 km nëpër Shqipëri, duke shkuar nga Korça, në Vlorë e duke dalë në Shkodër. Skuadra ka lëvizur më shumë se 1492 km jashtë llogaritjeve të fillimsezonit, me 11 takime nëpër Shqipëri, transferta këto që i kanë shijuar tifozët, të cilët nuk kanë lënë qytet pa parë. Çuditë kanë qenë nga më të ndryshmet. Derbi me Dinamon është luajtur në Vlorë ose 300 km larg.
Klasikja me Vllazninë u zhvillua në Lushnjë, ku Tirana u dënua për sjellje të tifozëve. Më e madhja ka qenë fakti se, për një sfidë me Laçin, ka udhëtuar deri në Korçë. Kupën e Shqipërisë, nga e cila u eliminua, skuadra bardheblu e luajti në Vorë. Tirana e mbylli kampionatin në vendin e tetë, por një nga faktorët e krizës së rezultateve është fakti se skuadra ka luajtur vetëm 10 nga 38 takimet në kryeqytet. Kalendari, pa ndeshjet e Europës, llogariste 20 ndeshje si pritës dhe 18 si udhëtues. Fakt është që Tirana ka zhvilluar 27 takime jashtë Tiranës, dhe 11 në kryeqytet, përfshirë katër derbet.
