Nga Albert Malaj
Të dashur qytetarë të bashkisë Memaliaj,
Miqtë e mi, ju bashkëpunëtorë të ngushtë të këtij rrugëtimi sfidues, mbështetës të shumtë, qytetarë të guximshëm për të ndryshuar vetveten vetëm duke u përballur.
Jam mirënjohës që me përulësi do ta quaj një ndjesi nga më emocionueset në jetë. Unë jam mësuar shpesh dhe me emocine në operacione të vështira paqeruajtëse, në të cilën ndahej ngushtë jeta nga vdekja, por gara dhe mbështetja juaj e pakufishme më dhuruan më shumë se çdo gjë emocion dhe ambicie për tu përballur në këtë betejë të vështirë dhe të pabarabartë. Ju mbetem mirënjohës pa fund banorëve të largët nga Shalësi në Gllavë, Selckë, Komar, Buz, Xhafaj, Luftinjë, Izvor, Zhapokikë, Martalloz, Levan,
Ankomemaj,Luftinje,Zhulaj,Vasjar, Iliras, Qesarat, Toç, Lulëzim, Krahës, fshati Memaliaj, Cërilë e Damës, Maricaj e Arrëz, Anevjos, Kashisht dhe qytetarët e Memaliajt duke lënë në fund qershinë mbi tortë Kalivaçin tim që folën dhe dhanë verdiktin e tyre për ndryshimin e këtij komuniteti të lënë në harrese, jo për shkak të gjeografisë së tij, por për arsye qartësisht të keqqeverisjes për këto 4 vite.
Ju falenderoj pamasë ju komentues, shpërndarës të platformës sonë, ideusit e projektit të zhvillimit, ekspertëve të platformës dhe këdo mik të rrjetit që sensibilizonte opinionin në çdo veprimtari të fushatës sonë. Falenderoj strukturat që me angazhimin e tyre, duke sfiduar çdo presion, duke flakur me neveri çdo lëmoshë që u ofruan në momentet kur fushata arriti pikën kritike.
Falenderoj pamasë të gjithë ata që analizuan me dinjitet efektet e dëmshme të shpërdorimit të parave publike nga administrata ekzistuese dhe si e tillë projektuan platforme zgjidhjeje duke përshkruar me detaje projektin tonë të zhvillimit dhe mbështetjes.
U hartuan me seriozitet dhe profesionalizëm projeksioni i zhvillimit të qytetit dhe njësive të tjera të bashkisë duke marrë përgjegjësinë e një infrastrukture dinjitoze në të gjitha sferat e saj. Falenderoj pa masë komisionerët dhe vëzhguesit e qendrave të votimit, numëruesit dhe mbështetësit qytetarë që nuk lejuan të deformohej verdikti i qytetarëve.
Duke qenë mirënjohës deri në përulësi për të gjithë, ju garantoj dhe marr përgjegjësinë se do të transformojmë të gjithë së bashku, me çdo qytetar, si ata që votuan pro meje, por dhe ata që nuk patën besim tek platforma ime, se do të bëjmë të mundur me kurajo dhe këmbëngulje realizimin e çdo pike të projektit tonë të zhvillimit me fuqinë që meriton bashkia Memaliaj.
Me mirënjohje,
Albert Malaj…
