Situata e jashtëzakonshme e shkaktuar nga tërmeti i 26 nëntorit vetëm sa largoi vëmendjen, por nuk e ndaloi procesin e zgjedhjeve të brendshme në Partinë Socialiste. Në Gjirokastër strukturat e PS-së nxorrën tre emra si kandidatë për të drejtuar partinë.
Një grua dhe dy burra. Bëhet fjalë për Matilda Gushin, e cila është drejtoreshë tek shkolla e mesme pedagogjike “Pandeli Sotiri”; Bledi Kaçi, i cili është kryetari aktual i PS-së dhe Gentian Llogon, drejtorin e Ndërmarrjes së Ujësjellësit.
Nuk ka ende një datë të saktë se kur do të zhvillohen zgjedhjet, ku ftohen të votojnë gjithë anëtarët e PS-së. Gjasat janë që ky proces të përmbyllet në muajin janar. Kryetari i i ri i PS-së do të drejtojë strukturat e socialistëve deri në zgjedhjet parlamentare të vitit 2021.
Pas tërmetit apokaliptik ka pak mundësi që të ketë zgjedhje të parakohshme. Opozita i ka ulur ndjeshëm tonet dhe gjatë vitit 2020 thjesht do të riorganizohet, nuk do të kërkojë më zgjedhje të parakohshme me ngulm. Ndërkohë sot në Kuvend Rama bëri edhe një lëvizje tjetër.
Zgjati gjendjen e jashtëzakonshme nga tërmeti deri më 31 mars 2020 duke “shtyrë” në një farë mënyre edhe çdo debat të mundshëm apo kërkesë nga opozita për zgjedhje të parakohshme, të cilat kurrsesi s’mund të zhvillohen edhe pa u përfunduar reforma zgjedhore.
©argjiroja.net
