Ferrari mban rekordin për fitore në Çmimin e Madh të Holandës, por fatkeqësisht suksesi i fundit i “Kokëkuqes” daton… plot 43 vjet më parë! Po, sepse triumfi i fundit i skuadrës nga Maranelo mes dunave të Zandvortit daton në vitin 1983 dhe mban firmën e Rene Arno.
Ndërkohë, “Kali” nuk ka lënë asnjë gjurmë në pesë edicionet e fundit, ato të zhvilluara nga viti 2021 e këtej, kur Botërori u rikthye në brigjet e Detit të Veriut pas 34 vitesh mungesë. Një version modern i Çmimit të Madh historik dhe klasik pas pushimeve të “Ferragostos”, që zhvillohej gjithmonë në Zandvort që nga fillimi i viteve ’50, por që këtë vit merr fund për shkak të përfundimit të kontratës mes Formula 1 dhe promotorit holandez. Pas tre fitoreve të idhullit vendas Maks Vershtapen me Red Bullin nga viti 2021 deri në 2023, në Zandvort, vetëm Xheki Stjuart dhe Niki Lauda kanë bërë të njëjtën gjë, ndërsa më mirë se ata ka bërë vetëm Xhim Klark me katër triumfe, erdhën fitoret e “McLaren-Mercedes” me Lando Norris në vitin 2024 dhe me Oskar Piastri në vitin 2025. Ky i fundit triumfoi pas dështimit të Norrisit, i cili po dominonte garën, por që, pasi përjetoi atë goditje të rëndë, arriti të merrte veten dhe të fitonte me shumë vështirësi duelin final të Abu Dhabit ndaj po këtyre Vershtapenit dhe Piastrit.
Për Ferrarin, Çmimi i Madh që shënon rikthimin pas pushimit të shkurtër veror dhe që, në fakt, hap fazën e dytë të Kampionatit Botëror, përfaqëson mundësinë e fundit për të lënë gjurmë në listën e fituesve të viteve të fundit në Zandvort. Duhet shlyer edhe hidhërimi i Çmimit të Madh të Holandës 2025, i cili përfundoi për të dy pilotët aktualë të Ferrarit në kthesën e ngritur nr. 3: Luis Hamilton e shkaktoi vetë aksidentin, ndërsa Sharl Lëklerk, i pafajshëm, u detyrua të dorëzohej pas kontaktit me Kimi Antonelin. Në atë periudhë, italiani po kalonte një spirale negative që zgjati gjatë gjithë verës, por që, në retrospektivë, u shndërrua në një përvojë të çmuar për “tanin” (këtë herë Kimin!).
Antoneli rikthehet në Zandvort si lider i renditjes së pilotëve, me 219 pikë, 50 pikë më shumë se Hamiltoni, 59 më shumë se shoku i tij i skuadrës Xhorxh Rasëll dhe 81 më shumë se Lëklerku, i cili është rikthyer në garën për titull edhe pse për momentin me shanse të kufizuara, falë një serie rezultatesh të fundit në nivel “botëror”. Piloti nga Monako ka grumbulluar 59 pikë në tri garat e fundit: i pari në Angli, i dyti në Belgjikë dhe i treti në Hungari.
Në të njëjtën periudhë, Antoneli ka marrë 48 pikë, Hamiltoni 44 dhe Rasëll 29. Ky trend i fundit i pilotit nga Monako rrezikon të krijojë njëfarë “sikleti” në Maranelo, mes kënaqësisë për konkurrueshmërinë aktuale të SF-26 edhe në pista që teorikisht janë armiqësore ndaj Ferrarit, dhe nevojës së dukshme për të përqendruar te vetëm një “Kali” përpjekjet për të ndjekur Antonelin. Për të përmbysur edhe më tej parashikimet synon “McLareni” i ringjallur, i cili, përveç fitoreve në Zandvoort në dy vitet e fundit, fitoi në Hungaroring Çmimin e Madh të fundit të zhvilluar përpara pushimit veror.
Në fund, nuk duhet nënvlerësuar as shtysa motivuese, sikur Vershtapen të kishte ndonjëherë nevojë për të, që i ofrohet holandezit nga mundësia e fundit për të shkëlqyer përpara “detit portokalli”. Gjatë pesë viteve të fundit, tifozët e tij e kanë shndërruar garën holandeze në një lloj “rave party” gjigant, ndërsa SuperMaks i ka shpërblyer denjësisht, veçanërisht me tripletën e fitoreve 2021-2023.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
