Kombëtarja e vajzave po vazhdon përgatitjet në Shkodër në prag të dy ndeshjeve të fundit të kualifikueseve të Kupës së Botës 2027 ndaj Çekisë dhe Malit të Zi.
Nën drejtimin e stafit teknik, vajzat kuqezi po zhvillojnë një program intensiv stërvitor, me fokus maksimal te sfidat e radhës. Gjendja e grupit paraqitet e mirë dhe nuk janë evidentuar probleme fizike në skuadër.
Departamenti i Komunikimit në FSHF bën me dije se mbrojtësja Aglia Iliadhi nuk do të jetë e gatshme për këto dy takime për shkak të një problemi shëndetësor. Pjesa tjetër e ekipit është e plotë dhe po stërvitet normalisht.
Kombëtarja do të udhëtojë të mërkurën pasdite drejt Çekisë, ku më 5 qershor, në orën 17:00, do të përballet me përfaqësuesen çeke në ndeshjen e parafundit të grupit. Takimi do të transmetohet drejtpërdrejt në FSHF TV.
Më 9 qershor, vajzat kuqezi do të mbyllin fushatën kualifikuese me sfidën ndaj Malit të Zi, që do të luhet në stadiumin “Loro Boriçi” në Shkodër, duke nisur nga ora 19:00.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
