Asgjë nuk është e rastësishme. Julian Ahmataj ka marrë prej javësh sinjale të qarta se nuk do të vazhdonte të ishte pjesë e Luftëtarit. Edhe pse ka bërë një punë heroike në Gjirokastër, “Panorama Sport” mëson nga burime të sigurta në klub se vazhdimisht trajneri elbasanas ka qenë në presion të madh prej drejtuesve për aktivizimin e disa lojtarëve të ardhur në janar, të cilët në fakt rezultuan se nuk po e bënin diferencën nga pjesa tjetër e ekipit.
“Të mbaj trajner vetëm prej rezultateve, sepse do të kisha hequr me kohë…”, mësohet t’i ketë thënë presidenti Tavo Ahmatajt në një debat që ka pasur pak javë më parë, ku të pranishëm kanë qenë edhe drejtuesit e tjerë të klubit. Përtej trysnisë që kishte javë pas jave, veçanërisht për aktivizimin e mesfushorit Angelos Hanti dhe sulmuesit Erik Uarden, Ahmataj vazhdoi punën duke pasur një mbështetje të madhe nga ndihmësi i tij, Neritan Novi dhe veçanërisht nga drejtori sportiv, Gentjan Nora.
Zyrtarë të klubit që njihen si të besuarit e presidentit (Vangjel Çavo dhe Rigels Malile), mësohet se kanë bezdisur jo pak trajnerin në punën e tij. Mirëpo, rezultatet pozitive “fshehën” edhe problemet, në një kohë që Ahmataj dhe drejtori Nora e mbajtën skuadrën të bashkuar, edhe pse në ekip e mësuan të gjithë se trajneri ishte nën presion. Mosaktivizimi i disa lojtarëve ishte vetëm nisja e krisjeve, pasi ata ishin afruar në skuadër nga ish-drejtori i klubit, Çavo.
“FLIRTI” ME TIRANËN
Përplasjet kulmuan mes drejtuesve dhe trajnerit para dhe pas ndeshjeve me Tiranën për Kupë dhe kampionat. Në Gjirokastër kanë dyshuar se Ahmataj, portieri Edvan Bakaj, si dhe mesfushorët Albano Aleksi dhe Behar Ramadani, kishin arritur një paramarrëveshje me Tiranën për sezonin e ardhshëm.
Pra, që Ahmataj të merrte drejtimin e bardhebluve dhe të tërhiqte në kryeqytet edhe disa nga titullarët. Sesa e vërtetë është kjo, do ta tregojë koha, por situata precipitoi kur ekipi u eliminua nga Kupa dhe në portë nuk u aktivizua Bakaj, nisur edhe nga fakti se emri i tij doli në “Panorama Sport” se kishte arritur akord me Tiranën për sezonin e ardhshëm. Të gjitha këto çuan në vendimin e djeshëm, i cili është unikal në llojin e tij, pasi bëhet fjalë për një pezullim dyjavor. Gazeta zbulon se pas largimit të Gentjan Mezanit, Tavo ka preferuar të rikthente në Gjirokastër si trajner serbin Mlladen Milinkoviç, por duke qenë se ky i fundit vuri kushte dhe me Ahmatajn ishte arritur një akord, iu besua drejtimi elbasanasit.