E mërkura e javës së ardhshme është afati i fundit për zyrtarizimin e listave të kandidatëve për deputetë. Ndërkohë diskutime në PS me kryeministrin Rama do të zhvillohen edhe përgjatë së dielës dhe fillimit të javës që vjen. Për qarkun Gjirokastër ku PS synon të marrë 3 mandate, situata është gati e qartë për tre vendet e para.
Lista do të kryesohet nga drejtuesja politike e PS, Mirela Kumbaro. I dyti pritet të jetë Tërmet Peçi, kryetari i Bashkisë Tepelenë. Emri i tretë është biznesmeni Pirro Dhima. Në diskutim mbetem tre emra të tjerë për të plotësuar listën; Alda Zholi, Shyqyri Hysi dhe Edjon Maliqi.
Zholi dhe Hysi kanë aplikuar në platformën “Deputeti që Duam”, ndërsa Maliqi u evidentua më tepër në Kongresin Rinor të PS e më pas në podcastin e kryeministrit Edi Rama. Megjithatë mbetet të presim nëse do të ketë lëvizje të tjera deri në zyrtarizimin e emrave.
E veçanta e këtyre zgjedhjeve janë listat e mbyllura dhe të hapura në 1/3 e tyre. Konkretisht për qarkun Gjirokastër, mandatin për socialistët e ka të garantuar drejtuesja politike e PS, Mirela Kumbaro. Të gjithë emrat e tjerë në listë poshtë saj mund të marrin mandatin qoftë dhe më një votë më tepër. ©Argjiroja.net
