Ministrja e Kulturës, Mirela Kumbaro dhe njëkohësisht kandidate për deputete e Partisë Socialiste në qarkun Gjirokastër i është përgjigjur deklaratave të Vangjel Tavos sot në mëngjes në Vizion Plus. Kumbaro ishte e ftuar sonte në mbrëmje për një invervistë në Ora News, ku është pyetur nga gazetarja edhe për deklaratën e deputetit të LSI-së, i cili u shpreh se nuk bëhet fushatë me deklarata “ma la amanet babai”, duke iu referuar indirekt Mirela Kumbaros ndonëse nuk e përmendi nominalisht me emër. Kumbaro ka thënë se familjen e ka të shenjtë dhe nuk lejon njeri që ta bënte pjesë të fushatës. Më poshtë përgjigjja e saj për deputetin e LSI-së.
“Nuk e kam dëgjuar në fakt këtë deklaratë, nuk e di për çfarë është fjala. Duke mos iu referuar konkretisht zotit Tavo përderisa s’e kam dëgjuar, ajo që dua të them është se në radhë të parë unë e kam shumë të shenjtë familjen, edhe përveçse nuk do të lejoja të bëhej fushatë me familjen e askujt besoj që kjo ka vlerë për të gjithë kolegët e forcave të tjera politike të cilët fushatën duhet ta bëjnë me punën tonë të gjithësecilit dhe forcat politike që prezantojmë dhe jo me familjet tona. Unë vij nga një familje e madhe gjirokastrite dhe libohovite, të cilën e kam jo thjesht krenari, por përgjegjësi dhe detyrë që t’ua çojë emrin përpara. Por si kandidate për deputete nuk jam zgjedhur vetëm për këtë. Ky është një raport i imi personal me votuesit. Por unë jam zgjedhur mbas katër vitesh në detyrën e Ministrit të Kulturës, ku pikërisht në qarkun e Gjirokastrës kemi bërë një punë jashtëzakonisht shumë të madhe, ku kemi hedhur investime si asnjëherë tjetër më parë dhe sot kemi një qark që shtatë Bashkitë janë kantiere të “Rilindjes Urbane”.
/ArgjiroLajm.net/
