Drejtuesja politike e Partisë Socialiste Mirela Kumbaro ka zhvilluar një sërë takimesh në njësitë Krahës, Qesarat e Memaliaj fshat, së bashku me kandidatët Tërmet Peçi e Shyqyri Hysi ku përmendi projektet për të cilat po punohet në Memaliaj dhe theksoi se në mandatin e katërt të qeverisjes së Partisë Socialiste, Memaliaj do të jetë në qendër të vëmendjes.
“Siç investuam për këtë rrugë të bukur panoramike që sjell zhvillimin deri këtu, kemi vazhduar dhe me investimet në bashkinë Memaliaj. Dëgjuam zërin e mësuesve dhe prindërve që kanë nevojë për një shkollë komplet të rinovuar dhe do të investohet me fondet e Ministrisë së Arsimit dhe Sportit dhe qeverisë shqiptare. Ka nisur po ashtu projekti për rinovimin dhe ndërhyrjeve në fasada, po me fondet e qeverisë”, u shpreh Kumbaro duke përmendur edhe investimet që mbështesin fermerët me kanalet vaditëse.
Nga njësia Krahës, në një takim me banorët e kësaj zone, Kumbaro tha se në mandatin e katërt, koha do të punojë për Memaliajn duke ndjekur të njëjtin model zhvillimi si Gjirokastra e Tepelena.
