Një ditë pas përkujtimit të ditëlindjes së Musine Kokalarit, ish-ministrja e Kulturës dhe njëherazi deputetja e Gjirokastrës, Mirela Kumbaro, ka bërë një shënim në faqen e saj në Facebook rreth figurës së disidentes që u përndoq nga regjimi komunist. Ndër të tjera Kumbaro i rikthehet edhe cështjes së shtëpisë ku jetoi dhe u rrit Musine Kokalari në Gjirokastër. Ajo thotë se Ministria e Kulturës e bëri gati një projekt restaurimi, por nuk pati dakordësi mes trashëgimtarëve për të vijuar me zbatimin.
“Por më vjen edhe shumë keq që, ndonëse Ministria e Kulturës realizoi projektin e restaurimit të shtëpisë ku ajo ka jetuar ne rini e që u dogj fatkeqësisht në vitin 2014; dhe vendosi në dispozicion të trashëgimtarëve edhe një fond të dedikuar për zbatimin e atij projekti restaurues, nuk u gjet dot dakordësia me të gjithë trashëgimtarët e banesës Kokalari për ta përfituar atë fond dhe për ta rijetëzuar banesën si një model shtëpie mikpritje me një hapësirë muzeale kushtuar Musinesë. Megjithatë, nuk e humbas shpresën se nuk do të jetë e largët dita që ky bashkëpunim do të rimerret dhe trashëgimtarët e shtëpisë do ta gjejnë me siguri me interes këtë projekt”, shkruan Kumbaro teksa thekson se “ne këtu do të jemi sërish për të shkuar në gjurmët e Musinesë për të mos harruar atë, për të mos harruar viktimat e persekutimit komunist, për të mos e lënë të keqen të përsëritet. Nuk e kam fare iluzionin se e kemi arritur të plotë qëllimin”.
©argjiroja.net
