Shqiptarët kanë nisur të grumbullohen para stadiumit ku do të mbahet takimi i kryeministrit Rama me emigrantët. Foto të publikuara në media greke tregojnë shqiptarët që po e presin me flamuj kuq e zi në duar në shkallët e stadiumit.
Një foto në mediat greke shihet një shqiptar mban në dorë një bluzë ku ka stampuar portretin e kryeministrit Rama. ‘Mirëserdhe’ , shkruhet në bluzë dhe slogani i PS-së për turin e diasporës “Krenar për Shqipërinë” dhe “Vetëm përpara”
Përpos fjalimeve, në stadiumin ‘Galatsi’ do ketë edhe spektakël, pasi për shqiptarët do të performojnë këngëtarët Era Rusi, Ylli Baka e Noizy.
Ministrja Elisa Spiropali dhe sekretari i Përgjithshëm Blendi Klosi do të mbajnë fjalime që do të pasohen nga fjala e kryeministrit Rama. Pas takimit, kryesocialisti do të ketë një takim me strukturat e degës së PS në Athinë ku do të shpërndaje dhe kartat për anëtarët më të rinj të kësaj force në emigracion.
Pas Athinës Rama do të jetë në Milano, Londër dhe Duseldorf për t’u takuar me shqiptarët që jetojnë në Itali, Mbretërinë e Bashkuar dhe Gjermani.
