Zendaya dhe Tom Holland mund të jenë tashmë të martuar, të paktën nëse u besohet deklaratave të stilistit të njohur Law Roach. Gjatë një interviste për Access Hollywood, në kuadër të Actor Awards 2026 të mbajtur të dielën, stilisti shumëvjeçar i Zendaya-s la të kuptohet se ceremonia martesore ka ndodhur tashmë, larg vëmendjes së publikut.
“Dasma ka ndodhur tashmë. Ju e humbët,” u shpreh Roach me humor. Kur u pyet drejtpërdrejt nëse kjo ishte e vërtetë, ai e konfirmoi duke qeshur, pa zbuluar detaje të tjera si data apo vendi ku mund të jetë zhvilluar ceremonia.
Zendaya dhe Holland e bënë publike lidhjen e tyre në vitin 2021, pasi u njohën gjatë xhirimeve të filmit Spider-Man: Homecoming në vitin 2017. Që prej asaj kohe, ata kanë qenë tejet të rezervuar për jetën personale.
Në një intervistë për The Hollywood Reporter në vitin 2023, Holland theksoi se privatësia e lidhjes së tyre është një zgjedhje e vetëdijshme. “Është diçka që e mbrojmë shumë dhe duam ta mbajmë sa më të shenjtë,” u shpreh ai.
Edhe Zendaya ka folur me admirim për partnerin e saj, duke theksuar se ai e përballoi famën e menjëhershme me qetësi dhe maturi. Në këtë kontekst, një martesë e fshehtë, larg syrit të mediave, do të ishte plotësisht në përputhje me mënyrën se si çifti ka zgjedhur të jetojë historinë e tyre të dashurisë.
