Nga Uruguai erdhën të dy dhe Daniel Fernandez u prezantua si trajner i parë dhe Luis Curbelo si ndihmësi i tij. Asnjëherë Fernandez nuk doli para gazetarëve para dhe pas ndeshjeve, pasi, sipas drejtuesve të Luftëtarit, nuk dinte gjuhën. Por asnjëherë emri i Fernandezit nuk ka figuruar në protokollet e ndeshjeve.
Ndoshta mund të mos ketë pasur licencën e duhur. Kohët e fundit mes dy uruguaianëve ka pasur edhe polemika, me sa duket. Gjithmonë ka qenë Luis Curbelo ai që bënte gjithçka, madje edhe në deklaratat pas ndeshjeve ai shprehej me “unë” dhe jo me “ne”. Pas humbjes me Kamzën mori vetë përgjegjësitë, që do të thotë se trajner ka qenë ai.
Curbelo ka luajtur në Greqi dhe di gjuhën, por nuk mund të thuhet me siguri se ishte vetëm kjo arsyeja, që Fernandez dilte gjithmonë në plan të dytë. Tashmë ai ka ikur dhe gjithçka e ka në dorë Curbelo. Nga ndeshja me Partizanin situata te gjirokastritët duhet të ndryshojë, pasi presidenca është e pakënaqur dhe ka paralajmëruar ndryshime apo masa. Luftëtari në fakt ka gabuar në Gjirokastër, ku në 2 ndeshje ka marrë vetëm 1 pikë.
