Presidenti i Luftëtarit, Grigor Tavo është në kërkim të trajnerit, që do të zëvendësojë Mladen Milinkoviç në krye të skuadrës së tij.
Edhe pse gjatë kësaj periudhe, është folur gjithmonë e më shumë për një trajner të huaj, burime të besueshme të “Panorama Sport”, kanë bërë me dije se dje, presidenti Tavo ka qenë në kryeqytet ku ka pasur një takim me shkodranin Elvis Plori.
Ky i fundit ka drejtuar disa skuadra, kryesisht në Kategorinë e Parë dhe njihet si një nga trajnerët e rinj të suksesshëm në vendin tonë. Por edhe pse mes palëve ka pasur bisedime, nuk dihet nëse është arritur një akord për të bashkëpunuar në sezonin e ardhshëm futbollistik.
Gazeta dje është munduar të ketë një kontakt si me presidentin Tavo ashtu edhe me trajnerin Plori, por asnjëri prej të dyve nuk ka qenë i disponueshëm.
Gjithsesi, shanset janë të mëdha që ai të jetë në krye të bluzinjve, edhe pse drejtuesit e klubit kanë zhvilluar bisedime intensive gjatë ditëve të fundit edhe me një trajner serb. Dita e sotme do të jetë vendimtare në këtë drejtim, pasi edhe drejtuesit e klubit nuk duan që ta shtyjnë më shumë çështjen e teknikut.
STËRVITJA – Ndërkohë skuadra nën drejtimin e trajnerit të 19- vjeçarëve, Petraq Meçi, ka vijuar dje përgatitjet në terrenin “Fusha e vjetër”. Tekniku ka pasur të disponueshëm plot 22 lojtarë, pasi me ekipin është bashkuar edhe sulmuesi 23-vjeçar Kristal Abazaj.
Por, ndërsa lojtarët duken të përkushtuar për të dhënë maksimumin në çdo seancë stërvitore, në kampin bluzi janë në “ankth” për të mësuar emrin e trajnerit të ri.
Gjithsesi një proces i tillë do të përfundojë shumë shpejt dhe lojtarët do të kenë mundësinë që të zhvillojnë një muaj përgatitje me trajnerin e sezonit të ri, i cili do të krijojë edhe idenë për lojtarët që ka në dispozicion, si dhe do të mundohet të fusë në skuadër idetë e tij për lojën. Objektivi i Luftëtarit për sezonin e ri do të jetë renditja në mesin e artë të tabelës së klasifikimit./panoramasport
