Ish-kryebashkiakja e Gjirokastrës, Zamira Rami, u dënua me 1 vit burgim nga Gjykata e Posaçme Kundër Korrupsionit dhe Krimit të Organizuar për “shpërdorim detyre”. Por togat e zeza bënë lëshim, duke mos e çuar prapa hekurave ish qytetaren e parë të Gjirokastrës. Dënimi i saj do të konvertohet me punë të detyruar në interes të publikut. Por si nisën hetimet nga organi akuzës për ish-kryetaren e bashkisë. Zamira Rami u mor nën hetim nga SPAK në janar të vitit 2020, pasi dosja e saj mbërriti në tavolinën e prokurorëve të SPAK-ut nga kolegët e tyre të prokurorisë së Gjirokastrës, që e transferuar për mungesë kompetencash.
Sipas dosjes hetimore, kryetarja e Bashkisë gjatë ushtrimit të funksioneve të saj, në lidhje me procedurat e ndjekura për lejen e ndërtimit dhe vazhdimin e punimeve për realizimin e projektit “Rikonstruksion i rrugës Kryqëzim me rrugën nacionale (Postbllok) – Sheshi i Çerçizit”, si dhe lejen e ndërtimit dhe vazhdimin e punimeve për realizimin e projektit “Rikualifikimi i hapësirave publike dhe rrugës hyrëse pranë Memorialit të Rilindasve në Gjirokastër”, ka kryer veprime në kundërshtim me aktet ligjore në fuqi, duke prishur dy prona të ligjshme të shtetasve Dritan Sako dhe Teodorti Xhai dhe duke i shkaktuar atyre një dëm pasuror në vlerë 5 600 520 (pesëmilion e gjashtëqindmijë e pesëqind e njëzetë) lekë.
Pikërisht ky kallëzim i bërë nga këta dy shtetas “mori në qafë” ish-kryebashkiaken e Gjirokastrës. Ndërkohë në janar dhjetor të vitit 2020, SPAK i mbylli hetimet dhe e çoi dosjen në Gjykatën e Posaçme. Zamira Rami e ka drejtuar Bashkinë Gjirokastër, si përfaqësuese e Lëvizjes Socialiste për Integrim në vitet 2015-2019. Më herët ajo ka mbajtur postin e Prefektit të Gjirokastrës. Pas mbarimit të mandatit të kryebashkiakes në vitin 2019, Zamira Rami u tërhoq totalisht nga jeta publike. Edhe për fushatën e zgjedhjeve të fundit ajo nuk kishte një rol aktiv, por u pa vetëm gjatë një takimi që pati në Gjirokastër kryetarja e LSI-së, Monika Kryemadhi. Dënimi që ajo mori sot sigurisht që e privon nga angazhime të tjera publike për një kohë të gjatë në kuadër të ligjit të dekriminalizmit, por natyrisht që është edhe një goditje në aspektin politik e akademik. ©argjiroja.net
