Një njeri i afërt i ekstremistit grek Kostandinos Kaçifas, që u vra nga RENEA në fshatin Bularat, zbulon detaje të tjera për aktivitetin ekstremist të 35-vjeçarit. Në faqen e tij në Facebook, Aleko Kacifa, teksa ka postuar një foto me shenjën e zisë, i përgjigjet dikujt që e ka ngushëlluar për vdekjen e kushëririt.
‘Ngushëllime Leko. Hero i vërtetë’, i shkruan një zonjë me emrin Maria Kuremeno.
Ndërkohë Aleko Kacifa i përgjigjet komentit me fjalët:
“Për ty, jo për mua. Unë thjesht nuk munda ta shpëtoj këtu e dy vjet më parë kur të tjerët e duartrokisnin. E di vetë ti”, i shkruan kushëriri i Kostandinos Kacifas.
Pra, përmes kësaj dëshmie zbulohet se 35-vjeçari kishte kohë që ishte përfshirë në aktivitete ekstremiste me organizatat nacionaliste greke. Madje kushëriri i tij kishte tentuar ta largonte prej tyre, por nuk kishte mundur. Në përgjigjen e tij ai i bën me dije zonjës se edhe ajo vetë e di se për çfarë bëhet fjalë, si dhe refuzon ta quajë ‘hero të vërtetë’ djalin nga Bularati. I afërmi i Kacifas i kërkon zonjës të ketë kujdes për fëmijët e saj.
Aktualisht trupi i Kostandinos Kacifas është në Tiranë për t’iu nënshtruar ekspertizës mjeko-ligjore. Në hetime janë përfshirë edhe pala greke. Të dielën e festës së Greqisë, ai hapi zjarr ndaj patrullës policore të Gjirokastrës, duke rrezikuar jetën e tyre. Më pas 35-vjeçari nuk iu bind thirrjeve të RENEA-s për t’u dorëzuar, por vazhdonte të qëllonte me kallash ndaj tyre. Pas shkëmbimit të vazhdueshëm të zjarrit, forcat RENEA e ekzekutuan me dy plumba.
© ArgjiroLajm.net
