Aeropori i Gjirokastrës pritet të riaktivizohet së shpejti, por me një destinacion tjetër. Jo për transport udhëtarësh dhe mallrash, vetëm për qëllime sportive dhe turistike.
Sot në Gjirokastër është zhvilluar një takim kur merrnin pjesë anëtarë të Forumit për Aeroportin, ministri Bledi Çuçi, përfaqësues të Federatës Shqiptare të Aeronautikës, Alket Islami, kandidati për kryebashkiak Flamur Golemi etj. Synimi është që pista të lirohet dhe aeroporti të jetë funksional në nivel sportiv e turistik.
E thënë me fjalë të tjera, do të zhvillohen gara të ndryshme sportive me mjete fluturuese dhe avionë të vegjël turistikë. Po kështu në planin afatgjatë pritet që të ndërtohet edhe një shkollë trajnimi për sportistët shqiptarë dhe ata rajonalë që duan të ushtrohen në Shqipëri.
Rijetëzimi i aeroportit në nivel sportiv dhe turistik është një vlerë e shtuar për Gjirokastrën dhe diversifikimin e ofertës turistike. Organizimi në këtë aeroport i eventeve të ndryshme sportive me mjete motorike fluturuese dhe avionë të vegjël, pritet të sjellë në Gjirokastër vizitorë të shumtë nga brenda dhe jashtë vendit.
©argjiroja.net
