Mesfushori gjirokastrit Kristo Minga ka qenë ndër të paktët emra që i kanë dhënë lamtumirën Luftëtarit në fund të sezonit të kaluar. Futbollisti 34-vjeçar u aktivizua vetëm në 9 ndeshje me skuadrën e vendlindjes në edicionin historik të kualifikimit në Europë dhe kërkonte më shumë minuta në ato që janë vitet e fundit të karrierës së tij futbollistike.
Për këtë arsye, futbollisti ka vendosur të kthehet në Greqi, ku ka kaluar thuajse gjithë karrierën e tij dhe ka nënshkruar pak ditë më parë kontratën me klubin e Kallamatës në kategorinë e tretë greke për të vazhduar aty. Kallamata dëshiron të krijojë një grup për t’u ngjitur më lart në sezonin e ardhshëm dhe Minga është afruar si një nga lojtarët me shumë eksperiencë që do ta ndihmojnë për të hedhur hapin cilësor.
“Jam i lumtur që jam një anëtar i familjes së Kallamata, një ekip historik me një fanellë të rëndë dhe një tifozeri fantastike. Mënyra se si më pritën administrata e klubit e sidomos prania e z. Janis Kristopulos luajti një rol vendimtar në vendimin tim. Pozita e Kallamatës nuk është në këtë kategori dhe ne besojmë se do të jemi në gjendje ta kthejmë aty ku e meriton”, ishin fjalët e para të Mingës si një futbollist i ri i kësaj skuadre.
Minga në të kaluarën ka luajtur për klube të tjera të njohura në Greqi si Trikala, Panserraikos, Kalloni, Ergotelis, Panthrakikos apo Levadiakos.
