Lionel Messi festoi të mërkurën 39-vjetorin e lindjes, ndërsa e gjithë Argjentina i bën homazh njeriut që ka lënë gjurmë të pashlyeshme në historinë e futbollit botëror.
Urimet kanë ardhur nga të gjitha anët, duke nisur nga kombëtarja argjentinase, e cila përmes rrjeteve sociale i ka kushtuar një mesazh të veçantë kapitenit të saj: “Gëzuar ditëlindjen, kapiten!”.
Edhe mediat argjentinase i kanë dedikuar hapësira të gjera kësaj dite të veçantë për kampionin e botës. Gazeta sportive “Olé” ka ftuar tifozët të shprehin vlerësimin e tyre për yllin argjentinas, duke i pyetur se çfarë dhurate do t’i bënin Leos në këtë ditëlindje.
Ndërkohë, Messi ka zgjedhur ta kalojë këtë ditë si gjithmonë: duke punuar. Në një video të publikuar në rrjetet sociale, sulmuesi shfaqet duke u stërvitur intensivisht në palestër, ndërsa në sfond dëgjohet kënga “Toka e Kampionëve”, një simbolikë që për shumë tifozë përmbledh më së miri karrierën e tij të jashtëzakonshme.
Në moshën 39-vjeçare, Lionel Messi vazhdon të mbetet një ikonë globale e futbollit dhe krenaria më e madhe e sportit argjentinas. Pas vetëm dy ndeshjeve të para në këtë botëror, ai ka realizuar 5 gola, duke u bërë golashënuesi më i mirë i të gjitha kohërave në Kupat e Botës me 18 gola.
