Tepelena ishte ndalesa e radhës e Lëvizjes Kombëtare për Lexim. Ministrja e Kulturës dhe njëherazi deputete e qarkut Gjirokastër, zhvilloi takim me nxënës të shkollave ‘7 Marsi’ e ‘Abaz Shehu’, të cilëve iu dhuruan gjithashtu libra të ndryshëm. Kumbaro tha se LKL do të përfshijë në mënyrë kapilare 12 qarqet e vendit, për të dëshmuar se dëshira për lexim është tek secili fëmijë, nëse dimë ta ushqejmë.
“Bibliotekat e qyteteve, të cilat janë në varësi të pushtetit vendor, vuajnë prej vitesh varfërimin e tyre nga mungesa e financimit, ndërsa duhet të kthehen në mediumin më të rëndësishëm në nivel lokal, për nxitjen e leximit”, u shpreh Kumbaro.
Ministria e Kulturës dhuroi 200 libra për fëmijë të moshës 0-14 vjeç, në bibliotekën e Tepelenës dhe në shkollën 9 vjeçare “7 Marsi”. Përmes Konkursit kombëtar për “Përshtypjen më të mirë mbi librin që ke lexuar”, organizuar në bashkëpunim me Bukinist, si partner mbështetës i kësaj nisme, LKL synon të arrijë përfshirjen e lexuesve të vegjël e të rinj, të cilët do të shpërblehen nga Bukinist me çeqe librash dhuratë.
Kryebashkiaku Tërmet Peçi tha se pas rikonstruksionit të Bibliotekës do të punohet për pasurimin e fondit me libra të rinj. Bibliotekat publike dhe ato të shkollave marrin një rëndësi të madhe veçanërisht në qytetet periferike, ku edhe mundësitë financiare të prindërve për të blerë libra janë më të zbehta.
Ministria e Kulturës synon që përtej sensibilizimit për rëndësinë e leximit e të kulturimit, sidomos tek fëmijët, të ndërhyjë dhe rregullojë në nivel ligjor e institucional politikat e Librit dhe kushtet për përhapjen e Librit si vlerë. Në këtë kornizë është hedhur në diskutim publik Ligji i ri për Librin, i cili parashikon ngritjen e Qendrës Kombëtare të Librit dhe Leximit; lehtësime fiskale për librin në formë tradicionale dhe elektronike dhe mekanizma lehtësues për bibliotekat në të gjithë vendin.
© ArgjiroLajm.net
