Lëvizja Socialiste për Integrim ka ankimuar në Kolegjin Zgjedhor vendimin e Komisionit të Ankimimeve dhe Sanksioneve, KAS, lidhur me qarkun e Gjirokastrës. Përmes një shkrese zyrtare partia e drejtuar nga Monika Kryemadhi kërkon rrëzimin e vendimit të KAS.
KAS vendosi me shumicë votash të rrëzojë kërkesat LSI për shpallje pavlefshmërie dhe rivotim duke lënë në fuqi rezultatin e votimit më 25 prill për Qarkun e Gjirokastrës.
Në reagimin e tyre përfaqësuesit e LSI e konsideruan vendimin e KAS si arbitrar e të njëanshëm, politik e në shërbim të Partisë Socialiste. Tashmë verdikti përfundimtar lidhur me këtë qark do t’i kalojë Kolegjit Zgjedhor, që është organi më i lartë vendimarrës për çështjet zgjedhore.
