Prej disa ditësh është vënë re një fenomen që po merr përmasa shqetësuese për LSI-në, ajo e “rrjedhjes” të të zgjedhurve të saj në këshillat bashkiak nga veriu në jug. Për këtë arsye, LSI-ja, përpos indiferentizmit publik për këtë fenomen, në bazë ka filluar ristrukturimin e saj. Zgjedhjet lokale janë vitin që vjen dhe motorët duhen ndezur. Deputeti i LSI-së, Luan Rama ka mbledhur paraditen e sotme strukturat e LSI-së në Skrapar për të diskutuar mbi aksionin e ri të kësaj force politike.
“Skrapari është një referenë krenarie për LSI-në. Revanshi politik i qeverisë nuk i tremb dot qytetarët e Skraparit,” – tha Rama në mbledhje me strukturat. Sekretari i Përgjithshëm i LSI-së deklaroi se nga Skrapari do të nisë procesi i riorganizimit tërësor të partisë. Duke folur për protestat dhe ato që pritet të mbahen kundër qeverisë, Luan Rama tha se ato janë institucion në demokraci dhe se LSI-ja do të mbështesë çdo protestë qytetare.
