Partizani ka bërë sot detyrën duke fituar, jo pa probleme përballë Luftëtarit, për të rimarrë përsëri i vetëm kreun e klasifikimit në Superiore. Të kuqtë kanë fituar 2-1 në një ndeshje që nuk do të kalojë pa polemika për shkak të vendimeve të gjyqtarit Cjapi sa i përket golit të parë të Partizanit dhe dy rasteve por penallti në pjesën e dytë.
Gjithsesi, Partizani dominoi në sfidën e sotme, edhe pse nuk ishte aq e dukshme sa në ndeshjet e mëparshme. Në fund, të kuqtë morën rezultatin që u duhej për të shkuar të qetë në sfidën ndaj Skënderbeut të javës së ardhshme. Ndërsa për gjirokastritët duket qartë se ka ende shumë punë për të bërë që të largohet nga zona e ftohtë e klasifikimit.
