Luftëtari do të kërkojë të rikthehet te fitorja në kampionat ndaj Flamurtarit. Dy humbjet radhazi, edhe pse ekipe që luftojnë për titull, kanë ndikuar disi në aspektin moral te gjirokastritët. Megjithatë, një arsye më shumë për të marrë tri pikë të dielën është ruajtja e vendit të katërt dhe thyerja e “tabusë” ndaj Flamurtarit, teksa bluzinjtë në tri ndeshjet e këtij sezoni me vlonjatët, nuk kanë arritur të fitojnë asnjëherë. Futbollistët janë optimistë se do të fitojnë dhe kjo konfirmohet në deklaratat e tyre.
Portieri Shkëlzen Ruçi është i mendimit se ndaj Flamurtarit duhet arritur me patjetër triumfi. Elbasanasi që mbron portën bluzi foli edhe për besimin që i ka dhënë trajneri Milinkoviç.
“Kemi besim në forcat tona, te fryma e grupit dhe, për më tepër, te mbështetja që na jep trajneri. Personalisht jam ndier mjaft komod në punën dhe komunikimin me të. Jam mirënjohës për besimin që më ka dhënë Milinkoviç. Fitorja me Flamurtarin nuk duhet të vihet në diskutim, pasi në të kundërt do të komprometonim objektivin tonë.
Realisht, Flamurtari është një ekip që meriton respekt. Mendoj se nuk e meriton fundin e tabelës, por i tillë është futbolli. Ne do të bëjmë gjithçka për të përfituar nga ky moment dhe për të realizuar objektivin tonë”, është shprehur portieri Ruçi, i cili e nisi sezonin në stol dhe më pas zëvendësoi Festim Mirakën.
Ndërkohë, me synimin për t’u përshtatur me fushën, dje skuadra bluzi u stërvit në stadiumin “Gjirokastra”. Në ndeshjen me Flamurtarin, një “armë” më shumë për bluzinjtë do të jetë edhe mbështetja e tifozëve. Hyrja në stadium pritet të jetë falas dhe nisur nga rivaliteti, por edhe tradita që kanë dy klubet, takimi konsiderohet si një derbi.
Flamurtari i ka shkaktuar në këtë kampionat humbjen më të thellë Luftëtarit (5-0) dhe kësisoj ka ardhur momenti i së vërtetës.
