Machine Gun Kelly, i njohur edhe si Colson Baker, ka habitur fansat me një rrëfim të rrallë dhe tepër të sinqertë për jetën e tij personale. Ndryshe nga imazhi luksoz që shpesh lidhet me yjet e muzikës, artisti ka treguar se ende përballet me pasoja të së kaluarës madje edhe në situata të zakonshme si udhëtimet me avion.
Gjatë një interviste prapa skenave në Sydney, reperi zbuloi arsyen pse iu deshën plot tetë vite për t’u rikthyer në Australi. Pa zbukuruar realitetin, ai pranoi se kishte pasur probleme ligjore pasi ishte kapur me kokainë gjatë një udhëtimi nga Zelanda e Re.
“U kapa me kokainë gjatë rrugës për t’u kthyer nga Zelanda e Re”, u shpreh ai hapur, duke shtuar se kjo çështje ende ndikon në përvojën e tij të udhëtimit. Për shkak të këtij incidenti, MGK nuk ka akses në shërbime si TSA PreCheck apo Global Entry, çka e detyron të presë në radhët e zakonshme të aeroportit, si çdo qytetar tjetër.
Megjithatë, përtej këtij realiteti, artisti duket se po jeton një fazë të re reflektimi dhe ndryshimi. Ai foli për një moment të fundit vetëdijësimi, ku ndjeu mirënjohje të thellë dhe kërkoi më shumë bekime në jetën e tij.
Ky transformim nuk është i rastësishëm. Vitin e kaluar, Machine Gun Kelly pranoi publikisht se ka hequr dorë nga alkooli dhe ka kaluar për herë të parë në një qendër rehabilitimi. Ai theksoi se ky ndryshim lidhet ngushtë me përgjegjësitë dhe dashurinë që ka për vajzën e tij, si dhe dëshirën për një jetë më të shëndetshme dhe të qëndrueshme.
“Sot shoh më qartë. Kam një vajzë që e dua dhe një jetë të bukur për të jetuar”, u shpreh ai.
Ndërsa mund të mos jetë më në korsinë VIP të aeroportit, duket se Machine Gun Kelly ka hyrë në një “nivel” tjetër atë të pjekurisë dhe vetëdijësimit. Dhe për shumëkënd, kjo është arritja më e madhe.
