Maldini midis urimeve për 53-vjetorin dhe mesazheve të merkatos

Urime për ditëlindjen dhe mesazhe me tekst për merkaton. Paolo Maldini është totalisht i angazhuar në punën e tij si drejtor sportiv i Milanit. Sot feston 53-vjetorin, periudhë nga e cila më shumë se 40 vite i ka kaluar me kuqezinjtë. Pasi udhëhoqi ekipin si kapiten për më shumë se dy dekada, ai mori post drejtuesi. Një dolli për kthimin në Champions League dhe një tjetër për ekipin që do të ndërtohet. Në fakt, java e ardhshme do të jetë thelbësore për zgjidhjen e nyjeve dhe mbylljen e tri marrëveshjeve të rëndësishme.
E para është formalitet: Sandro Tonali do të blihet nga Brescia. Zyrtarizimi është planifikuar javën e ardhshme. Pas 37 ndeshjeve vitin e kaluar dhe 10 milionë eurove të paguara tashmë për huazimin, klasi i fantazistit të datëlindjes 2000 nuk diskutohet te kuqezinjtë. Kjo është goditja e tretë e verës, pas blerjes së Maignan (15 milionë) dhe sigurimit të kartonit të Tomori (28). Milani mori një zbritje të vogël (rreth 15% të 25 milionëve), Brescia mori disa lojtarë: Lorenzo Colombo dhe Giacomo Olzer.
Përveç kësaj, për të luajtur në Champions League nevojiten lojtarë nga “shtëpia”. Tetë nga 25 lojtarët në listë duhet të jenë trajnuar në Itali (4) ose në akademinë e klubit (të paktën 4). Tonali përdoret gjithashtu për këtë. Kapitulli i mbrojtësve? Theo dhe Calabria janë aty, por Milani po kërkon dy zëvendësues. Le të fillojmë nga e majta: Identikiti i zëvendësit të Theo i referohet një lojtari krahu, me ritëm dhe cilësi. Junior Firpo, 24 vjeç nga Barcelona, ​​ishte në radarët e Maldinit.
I lindur në Santo Domingo, i natyralizuar në Spanjë, 18 ndeshje dhe një gol në sezonin e fundit, Firpo është objektivi numër një për të forcuar të majtën e prapavijës. I rritur në Betis, ai ka një lidhje kurioze me Italinë: më 2019 fitoi Kampionatin Europian U-21 me Spanjën, duke luajtur tri ndeshje nga fillimi: kundër Belgjikës dhe Francës në Reggio Emilia, si dhe finale ndaj Gjermanisë në Udine.
Diogo Dalot i tha lamtumirë Milanit në fund të majit, pas një viti huazim nga Manchester United, duke lënë mbas 33 ndeshje dhe 2 gola kuqezi. Ndeshjet e tij të mira me Portugalinë U-21 e bindën Maldinin të vinte përsëri bast për të, kështu që qëllimi është të mbyllet huazimi. Dalot është 22 vjeç, ai mund të luajë në të dy krahët. Si zëvendës i Calabria do të ishte profil perfekt.