Federico Dimarco po zhvillon një tjetër sezon fantastik, me 5 gola dhe 13 asiste, duke qenë një nga lojtarët më përcaktues në radhët e Interit. Numrat e anësorit “azzurr” nuk mund të kalonin në heshtje; përkundrazi, kanë zgjuar interesim të fortë nga disa klube të Premier League.
“Tuttosport” shkruan se Manchester United është vënë në ndjekje të Dimarcos. Përfaqësues të “Djajve të Kuq” do të jenë të pranishëm në Derbin e Italisë për ta ndjekur nga pranë jo vetëm Dimarcon, pasi një tjetër objektiv i tyre është edhe Pierre Kalulu i Juventusit. Duke u kthyer te Dimarco, anësori zikaltër ka kontratë me Interin deri në vitin 2027, por prej kohësh palët kanë arritur një akord paraprak për ta rinovuar deri në vitin 2030.
Në shtëpinë e Interit janë të vetëdijshëm për interesimin që ekziston për Dimarcon dhe, për këtë arsye, po nxitojnë të rinovojnë kontratën aktuale, ku parashikohet edhe një përmirësim i ndjeshëm i pagës, duke e barazuar me shokët e tij te përfaqësuesja, Barella dhe Bastoni.
