Në një intervistë thellësisht personale me CBS News Sunday Morning, aktori dhe komediani Martin Short e quajti vdekjen e vajzës së tij, Katherine, “një makth për të gjithë familjen”, duke folur hapur për problemet e shëndetit mendor me të cilat ajo ishte përballur për vite me radhë.
Katherine Short vdiq në shtëpinë e saj në Hollywood Hills, me mjekun ligjor që konfirmoi se ishte vetëvrasje.
Martin Short e krahasoi humbjen e vajzës së tij me atë të gruas së tij, Nancy Dolman, e cila vdiq në vitin 2010 nga kanceri në vezore. “Shëndeti mendor dhe kanceri janë të dyja sëmundje. Dhe ndonjëherë këto sëmundje janë terminale ” , tha ai.
Siç zbuloi ai, vajza e tij kishte vite që luftonte me probleme serioze të shëndetit mendor, përfshirë çrregullimin kufitar të personalitetit: “Ajo bëri më të mirën që mundi, derisa nuk mundi më ta bënte.”
Aktori foli gjithashtu për nevojën për t’i dhënë fund stigmës që rrethon shëndetin mendor dhe vetëvrasjen. “Nuk duhet t’i fshihemi fjalës ‘vetëvrasje’. Duhet të pranojmë se mund të jetë faza e fundit e një sëmundjeje”, tha ai.
Katherine ishte më e madhja nga tre fëmijët e adoptuar të çiftit. Edhe pse mbante një profil të ulët, ajo kishte studiuar psikologji dhe sociologji dhe punonte si punonjëse sociale e çertifikuar. Aktori zbuloi gjithashtu se vitet e fundit ka përjetuar humbje të njëpasnjëshme të njerëzve në rrethin e tij të ngushtë, një fakt që, siç tha ai, e detyroi të zhvillonte “një mekanizëm mbijetese kundër pikëllimit”.
Rrëfimi i tij u bë me rastin e dokumentarit të tij të ri në Netflix, Marty, Life Is Short, i cili do të shfaqet premierë më 12 maj dhe dokumenton si humbjet e tij në karrierë, ashtu edhe ato personale.
