Aktori fitues i Oscarit, Matthew McConaughey, ka rrëfyer një nga periudhat më të pazakonta të jetës së tij, kur vendosi të largohej nga Hollywood-i dhe fama për të rigjetur veten. Në një intervistë për “No Magic Pill”, aktori zbuloi se kaloi 22 ditë në Peru pa energji elektrike, duke përdorur vetëm emrin “Mateo”, larg identitetit të yllit të kinemasë.
McConaughey tregoi se në atë periudhë po përpiqej të kuptonte se çfarë në jetën e tij ishte reale dhe çfarë vinte si pasojë e famës së papritur. Ai tha se kishte nevojë të “qëndronte me këmbë në tokë” dhe të shkëputej nga gjithçka që lidhej me Hollywood-in.
Sipas aktorit, ditët e para të udhëtimit ishin të vështira dhe të paparashikueshme, por më pas ai përjetoi një lloj “ndriçimi” personal që e ndihmoi të kuptonte se mund të jetonte i lumtur edhe larg famës.
Ylli i filmave The Wedding Planner dhe How to Lose a Guy in 10 Days tha se një nga gjërat më të rëndësishme për të ishte fakti që njerëzit që takoi në Peru e njihnin vetëm si “Mateo” dhe jo si një personazh të famshëm.
Vite më vonë, aktori u largua sërish nga Hollywood-i dhe u zhvendos në Teksas me familjen e tij, pasi ndiente se industria po e kufizonte vetëm në rolet e komedive romantike. Ai madje mendoi të hiqte dorë plotësisht nga aktrimi dhe të ndiqte profesione të tjera, si mësues apo udhërrëfyes në natyrë.
