Rivalët e vjetër të sezonit 2025, një kampionat që premtonte shumë dhe përfundoi në mënyrë dramatike, sot ndodhen në rrugë të ndryshme. MekLareni, kampion në fuqi në Formula 1, dhe Maks Vershtappen nuk duket se do të bashkojnë forcat. Piloti holandez po përballet në vitin 2026 me një “RB22” jo konkurrues dhe me një rregullore që nuk i përshtatet, ndërsa MekLaren është rikthyer në elitë.
Gara në Japoni konfirmoi se skuadra britanike është pretendente serioze për podiume dhe më shumë. Megjithatë, dukej sikur historia mes Vershtapenit dhe ekipit nga Uoking mund të kishte një tjetër kapitull. Transferimi i inxhinierit të tij, Xhanpiero Lambiase, te MekLareni shkaktoi një “tërmet” në bokset e Formulës 1 dhe tregoi ambicien e madhe të ekipit. Madje, mediat holandeze raportuan se ëndrra e madhe e MekLarenit ishte pikërisht afrimi i Vershtapenit, një skenar që sot duket shumë i largët.
E ARDHMJA E VERSHTAPENIT
CEO i MekLarenit, Zak Braun, është i prerë, Maksi është një nga më të mirët, por e ardhmja e tij mund të jetë diku tjetër. “Jam shumë i kënaqur me Lando Norrisin dhe Oskar Piastrin. Ata kanë kontrata afatgjata dhe funksionojnë shumë mirë si në pistë, ashtu edhe jashtë saj. Nuk kemi asnjë arsye të ndryshojmë dy yjet tanë”, deklaroi ai për “Sky”. Braun madje shkon më tej duke sugjeruar një destinacion të mundshëm për katër herë kampionin e botës: “Maksi është një talent i jashtëzakonshëm. Por nëse duhet të vë bast, do të thosha se ai mund të përfundojë te Mercedesi”. Një mesazh i qartë: dera e MekLarenit është e mbyllur për momentin. Sigurisht, në Formula 1 gjithçka mund të ndryshojë. Një tjetër mundësi për Vershtapenin mund të jetë edhe një pauzë nga garat. “Ai mund të bëjë çfarë të dojë”, u shpreh Lando Norris. “Ndonjëherë më pëlqen të garoj kundër tij… ndonjëherë jo. Është një nga më të mirët që kemi parë ndonjëherë, lufton fort dhe ta vështirëson jetën. Të gjithë e duam në Formula 1, por askush nuk e di çfarë do të vendosë…”
OFENSIVA “PAPAYA”
MekLareni preferon të fokusohet te vetja, një strategji e arsyeshme duke parë formën aktuale. Skuadra ishte shumë pranë fitores në Japoni dhe e ardhmja duket premtuese. Madje, “MCL40” pritet të sjellë përditësime të mëdha teknike në Çmimet e Mëdha të Majamit dhe Kanadasë, që shënojnë rifillimin e sezonit 2026 pas pushimit të prillit. “Do të shihni një makinë pothuajse krejtësisht të re”, deklaroi drejtuesi i ekipit, Andrea Stela. “Po punojmë ngushtë me Mercedesin dhe kemi ngushtuar diferencën në motor. Megjithatë, presim që edhe rivalët të sjellin zhvillime të mëdha. Diferencën do ta bëjë kush arrin të nxjerrë performancën maksimale”, u shpreh drejtuesi italian i skuadrës “papaya”.
