Fitorja në zgjedhjet e së shtunës në Australinë e largët e liderit të opozitës, Anthony Albanese u pasqyrua menjëherë edhe në mediat shqiptare që nxituan ta etiketonin atë si “shqiptar” apo “arbëresh”.
“Një shqiptar në krye të qeverisë australiane” – ishte njëri nga titujt. Kishte edhe më të përmbajtur që shkruanin se bëhej fjalë për një arbëresh apo një “shqiptar” në thonjëza.
Po a është vërtet Anthony Albanese është një pasardhës i një familjeje shqiptare?
Ajo që dihet zyrtarisht është se nëna e tij ishte irlandeze ndërsa babai, Carlo Albanese vinte nga ishulli Barleta e Italisë, një qytet në rajonin e Pulias në Italinë juglindore. Të dy u njohën gjatë një udhëtimi me anije. “Albanese” është një mbiemër italian që do të thotë “shqiptar”.
Sipas ancestry.com, “Albanese” ishte një emër që në Itali i jepej dikujt nga Shqipëria ose nga një prej vendbanimeve shqiptare në Abruzzo, Pulia, Kampania dhe Siçili.
“Në Pulia jeton një komunitet i madh arbëresh. Besohet se aty jetojnë rreth 100 mijë arbëreshë dhe nga ky komunitet vjen edhe babai i politikanit australian” – është një nga shpjegimet që japin mbështetësit e linjës se Albanese është shqiptar.
“Një shenjë e fortë e origjinës arbëreshe është mbiemri ‘Albanese’, që në italisht do të thotë “shqiptar”. Arbëreshët janë pasardhës të refugjatëve shqiptarë që u larguan nga trojet e tyre në Ballkan dhe u vendosën në pjesët jugore të Italisë në mesjetë, pas pushtimit osman të një pjese të madhe të Evropës” – thuhet në raportimet e Oculus News, një faqe shqiptarësh në SHBA dhe Australi.
Pretendimet e grekëve
Por përveç medieve shqiptare edhe ato greke janë angazhuar të tregojnë se kryeministri i ri i Australisë u përket atyre.
“Edhe pse të gjithë Australianët e njohin Anthony Albanese për rrënjët e tij italiane dhe irlandeze, jo shumë e dinë se atdheu i tij stërgjyshor në Italinë jugore ka një origjinë greke të lashtë” – Greek City Times.
Gazeta greke thotë se Barletta, vendlindja e babait të tij u themelua nga grekët e lashtë. Në shekullin e IV para Krishtit dhe prejardhja e emrit është “Baal-El” nga fenikasja, kohë kur rajoni i Pulias ishte pjesë e Botës së Lashtë Greke.
Çfarë ka thënë vetë Albanese?
Ai asnjëherë nuk ka folur për origjinën e tij. Kjo ndoshta se edhe babain e tij të vërtetë e ka njohur shumë vonë. Ai e dinte të vdekur babain e tij deri në moshën 15-vjeçare.
Nëna i kishte thënë se ai kishte vdekur në një aksident në Europë derisa i tha se ai mund të ishte gjallë kur u bë adoleshent. Vetëm atëherë nëna i rrëfeu se mes tyre kishte pasur një lidhje të shkurtër dashurie gjatë një udhëtimi me anije.
Më vonë kuptoi se ishte shtatzënë, por në atë kohë ishte e vështirë të rriste një fëmijë jashtë martese. Për këtë ajo sajoi historinë se i fejuari i saj vdiq në aksident dhe vetëm në prag të vdekjes i tregoi të birit të vërtetën.
Pas vdekjes së nënës në vitin 2002 ai nisi kërkimet. Albanese nuk mundi ta gjente babanë e tij deri në vitin 2009 kur edhe krijoi një lidhje me të. Carlo vdiq nga kanceri në vitin 2014.
Në një intervistë për mediat italiane, gazetari e pyeti nëse duhet ta thërriste “Allbaniz” apo “Albanese” ai iu përgjigj me humor: “Më thirr Albi”.
