Ministri i Punës dhe Çështjeve Sociale në Greqi, Adonis Georgiadis dha sot një mesazh të ashpër për Shqipërinë pas burgosjes së kryebashkiakut të zgjedhur të Himarës, Fredi Beleri duke theksuar se vendi fqinj “do të ketë pasoja për anëtarësimin në Bashkimin Evropian nëse pengon betimin e Belerit”.
Në një intervistë për ERT-në, ministri bëri të qartë se Greqia do të bllokojë çdo financim europian për Shqipërinë, për sa kohë të zgjasë çështja Beleri
“Ta harrojë paratë nga BE nëse pengon betimin e Beleri. Shqipëria do të harrojë paratë nga Europa nëse Fredi Beleri nuk betohet si kryebashkiaku i Himarës.
Shqipëria do paguajë çmim shumë të lartë nëse vazhdon të shkelë të drejtat e grekëve.”- tha ministri i Punës në Greqi.
Në vijim ai deklaroi se këto janë masat e para dhe në vijim do shohim e do bëjmë sepse sipas tij “Greqia ka shumë armë në duar”.
“E prerë dhe kjo. Nëse tentojnë të ribëjnë zgjedhje të tjera në Himarë duke mbajtur Fredi Belerin në burg, kjo për Greqinë do të thotë marrëdhënie të këqija me Shqipërinë për një kohë të pacaktuar. Shqipëria do ta paguajë shtrenjtë nëse vazhdon të shkelë të drejtat e grekëve në Vorio Epir”, deklaroi ministri grek, Adonis Georgiadis.
Ai shtoi se nëse zgjedhjet përsëriten ose betohet një kryetar tjetër bashkie, “për Greqinë do të jetë faktor i keq i marrëdhënieve me Shqipërinë për një periudhë të pacaktuar”.
