SME Albania organizon për të dytin vit radhazi Akademinë Verore për ndërmarrjet e vogla dhe të mesme (SME) në fokus të së cilës do të jetë menaxhim i eksporteve. Ky program u ofron sipërmarrësve informacione të domosdoshme për të pasur sukses në tregjet ndërkombëtare. Programi fokusohet në praktikat ndërkombëtare të bërjes së biznesit, në procedurat dhe dokumentacionin e eksportit, tregtinë ndërkombëtare, barrierat tregtare dhe ndërkombëtarizimin e sipërmarrjeve të vogla dhe të mesme (SME).
Akademia Verore ofron njohuri për menaxhimin e eksporteve të ndërmarrjeve të vogla dhe të mesme që duan të specializohen në fushën e tregtisë ndërkombëtare. Programi do të mbështesë këto ndërmarrje për të kuptuar konceptet e bërjes së biznesit jashtë vendit, marketingun në nivel ndërkombëtar, planifikimin financiar, qasjen në financa dhe rëndësinë e standardeve dhe cilësisë.
Me mbylljen e akademisë verore, dy pjesëmarrës fitues do të fitojnë një çmim që përmban një paketë trajnimi një mujore në Akademinë Ndërkombëtare të Biznesit (AIBO) në Pekin të Kinës. Pjesëmarrësit do të kenë mundësi që gjatë trajnimit në Kinë të mësojnë mbi rritjen e kapaciteteve të eksportit për vendet në zhvillim dhe ngritjen e kapaciteteve në reduktimin e varfërisë të OJQ-ve për vendet në zhvillim.
