Partizani vijon të ndërtojë skuadrën për sezonin e ri, ndërsa drejtuesit presin edhe zyrtarizimin e trajnerit Florin Bratu për të përmbyllur lëvizjet më të rëndësishme të merkatos. Edhe pse baza e ekipit është ruajtur, organika ende nuk mund të konsiderohet e plotësuar. Reparti që kërkon ndërhyrjen më urgjente mbetet sulmi, më konkretisht krahu ofensiv.
Largimi i Vusal Isgandarlit ka lënë një boshllëk të rëndësishëm, pasi azerbajxhanasi ishte golashënuesi më i mirë i skuadrës në kampionatin e kaluar me gjashtë gola. Aktualisht, Laorent Shabani është alternativa kryesore në atë rol, por vetëm një futbollist nuk mjafton për një sezon të gjatë dhe me objektiva të rëndësishëm. Shabani nuk arriti të përshtatej plotësisht pas afrimit në merkaton e janarit, megjithëse te Partizani besojnë se ai do të tregojë më shumë vlera gjatë sezonit të ri.
Për këtë arsye, afrimi i një tjetër sulmuesi anësor mbetet prioriteti kryesor i klubit. Një tjetër repart ku pritet të ketë lëvizje është qendra e mbrojtjes. Pas largimit të Altin Bytyçit, të kuqtë kanë humbur një futbollist me eksperiencë dhe një nga liderët e skuadrës. Marcelino Preka dhe David Atanaskoski përbëjnë bazën e repartit defensiv, por drejtuesit synojnë të shtojnë edhe një qendërmbrojtës tjetër për të rritur konkurrencën dhe alternativat. Një afrim i tillë do t’i jepte më shumë siguri skuadrës, sidomos duke pasur parasysh se Partizani pësoi 48 gola në sezonin e kaluar.
Në repartin e mesfushës situata duket më e qetë. Lojtarë si Rouan Human, Arafat Dumbia, Kamer Qaka, Redon Ismaili dhe Valentino Murataj krijojnë një grup cilësor dhe me alternativa. Pikërisht për këtë arsye, mesfusha nuk konsiderohet prioritet në këtë merkato, përveç rasteve kur do të ketë ndonjë largim të papritur apo okazion për të transferuar.
Edhe porta duket e konsoliduar me Pano Qirkon, i cili mbetet një nga pikat më të forta të skuadrës. Në sulmin qendror, Partizani ka në dispozicion Xhuliano Skukën dhe Albers Keko, dy futbollistë nga të cilët pritet shumë më tepër gjatë sezonit të ardhshëm. Megjithatë, gjithçka do të varet edhe nga gjendja fizike e tyre, pasi dëmtimet i penalizuan ndjeshëm gjatë kampionatit të kaluar.
Një tjetër element që mund të ndikojë në merkato është edhe mendimi i trajnerit të ri. Florin Bratu pritet të japë miratimin përfundimtar për çdo afrim dhe të përcaktojë profilet që i nevojiten skuadrës. Vetëm pas nisjes së punës me grupin, rumuni do të krijojë një ide më të qartë për nevojat reale të organikës. Deri atëherë, drejtuesit vazhdojnë të monitorojnë tregun dhe të mbajnë kontakte me futbollistë të ndryshëm.
Objektivi është i qartë: të plotësohen boshllëqet pa bërë lëvizje të nxituara. Në këtë moment, një sulmues anësor dhe një qendërmbrojtës duken dy pozicionet që kërkojnë ndërhyrjen më të shpejtë. Nëse Partizani arrin të përforcohet me cilësi në këto role, atëherë organika do të jetë shumë më e kompletuar dhe skuadra do të ketë më shumë argumente për të synuar rikthimin mes pretendentëve për titull në sezonin e ri.
