Pas deklaratave të forta të Metës që tha se nëse nuk kapen dhunuesit e anëtarit të LSI-së do armatosë popullin, vjen edhe reagimi i Policisë së shtetit.
Policia e Shtetit ka reaguar përmes një deklarate ku thuhet se policia ndjen “keqardhje për sulmin nga ana e një lideri politik”. Blutë shkruajnë se po bëhen të gjitha hetimet e nevojshme për rastin, ndërsa nuk ka asnjë provë që është një veprim me prapavijë politike.
Reagimi i Policisë së Shtetit
Keqardhje për sulmin e sotëm mbi Policinë e Shtetit nga ana e një lideri politik, lidhur me incidentin e ndodhur në Lezhë.
Ashtu sikundër e ka komunikuar me transparencë të plotë më parë, Policia e Shtetit përsërit se ka kryer të gjitha veprimet hetimore dhe nuk ka asnjë provë për prapavijën politike të incidentit.
Pretendimet e personit të goditur po vazhdojnë të hetohen. Por mbetet fakti që në deponimin e tij ai ka folur për persona të panjohur dhe nuk ka raportuar asgjë konkrete që të ngrihet dyshimi i arsyeshëm se incidenti është i motivuar politikisht.
Policia e Shtetit do të vazhdojë të kryeje me përgjegjshmërinë më të lartë profesionale detyrën e saj kushtetuese e ligjore dhe u bën thirrje të gjitha subjekteve e liderëve politikë të shmangin çdo përfshirje direkte ose indirekte të Policisë së Shtetit në retorikën e tyre elektorale.
