Me eliminimin në Bullgari, Partizani ka mbyllur një kapitull, të cilin fatkeqësisht klubi e nisi nga fundi, duke mos u prezantuar në Ligën e Europës me një ekip dinjitoz. Me shumë mundësi Sulejman Starova e ka mbyllur misionin si trajner te “demat”, por “Bobi” do të mbetet pjesë bordit drejtues të klubit.
Partizani i Luçiano Moxhit, përgjegjësi i skuadrës së edicionit të ri, pritet të marrë rrugë javën që vjen. Ky ekip duhet të nisë nga trajneri dhe më pas të zbulohen edhe përforcimet, ku klubi ka nevojë për afrime dhe alternativa në çdo repart. Dy përballjet me Botev Plovdivin treguan se ekipi ka mangësi të theksuara, por edhe mungesë dëshire nga disa lojtarë, të cilët me sa duket kërkojnë që të nisin një aventurë të re.
Por para se të vendoset për përforcimet, më parë duhet sqaruar çështja e trajnerit të ri. Trajneri i Luftëtarit, Mladen Milinkoviç, prej kohësh lakohet si alternativë, madje ka qenë vetë presidenti Gaz Demi ai që ka folur me superlativa për serbin. Por gjasat janë që Moxhi të preferojë një trajner italian, i cili do t’i shkonte përshtat filozofisë së punës së tij.
Milinkoviç mbetet i preferuari i tifozëve të kuq, por edhe i presidentit Demi. Ndërsa lobi italian, ku bën pjesë edhe këshilltari i presidentit Suljeman Starova, janë për një teknik nga përtej brigjeve të Adriatikut. Me shumë mundësi kjo dilemë pritet të zgjidhet shpejt dhe ekipi të nisë punën për sezonin e ri në Superiore.
