Pavarësisht se policia thotë se situata do të jetë ndryshe këtë vit, reputacioni që krijuam në 2016 si kultivues të mëdhenj droge do të vazhdojë t’i paraprijë Shqipërisë.
“Shqipëria është problemi kryesor i Greqisë sa i përket trafikut të drogës” ështu është shprehur ministri grek i Mbrojtjes së Qytetarit, i cili në një intervistë për radion greke “Real FM”, evidentoi rritjen e fenomenit të drogës në Greqi.
Ai fajësoi Shqipërinë për numrin e madh të rasteve të trafikut të drogës nga vendi ynë drejt shtetit grek. Nikos Toskas e cilësoi një fenomen shqetësues dhe që duhet të marrë zgjidhje.
“Droga është një problem i madh, dhe ky problem quhet Shqipëri. Në gjashtë muajt e fundit kemi kapur rreth 10 ton kanabis që kalon nga kufiri shqiptar. Kjo është një situatë e papranueshme për një vend sovran, për një vend që dëshiron të quhet serioz, por që ka një problem të madh me kultivimin e drogës”, tha ministri grek Nikos Toskas.
Në fakt pavarësisht bashkëpunimit rajonal mes vendeve duket se droga “Made in Albania” vijon të mbetet një problem i madh për fqinjët.
