Një incident i rëndë ka tronditur aktivitetet paralele të Cannes Film Festival, pasi Miss Venezuela Global 2025, Andrea del Val, ka denoncuar publikisht një sulm fizik nga stilisti i saj, Giovanni Laguna, brenda hotelit ku po qëndronte në Kanë.
Sipas raportimeve të mediave ndërkombëtare dhe videove të publikuara nga vetë modelja në rrjetet sociale, ngjarja ka ndodhur pas një debati që më pas është përshkallëzuar në përleshje fizike. Në pamjet e shpërndara online, Andrea del Val shfaqet me gjak në fytyrë dhe dëmtime të dukshme, ndërsa dhoma e hotelit shihet në gjendje të rrëmujshme. Në video, ajo akuzon drejtpërdrejt stilistin për sulmin ndaj saj. 
Sipas dëshmitarëve, të ftuarit e hotelit kanë dëgjuar britma, zhurma dhe shenja përleshjeje, duke njoftuar menjëherë policinë franceze. Autoritetet kanë ndërhyrë në vendngjarje dhe kanë arrestuar Giovanni Laguna, i cili më pas është parë i shoqëruar me pranga nga efektivët e policisë.
Andrea del Val ka marrë ndihmë mjekësore dhe raportohet se ndodhet jashtë rrezikut për jetën. Në një reagim të mëvonshëm, ajo konfirmoi se ndaj rastit është hapur një hetim zyrtar dhe se ka vendosur të mos japë më shumë detaje deri në përfundimin e procedurave ligjore.
Deri tani, autoritetet franceze nuk kanë bërë publike motivet e konfliktit dhe as akuzat zyrtare që mund të rëndojnë mbi stilistin.
