Kryeministri grek, Kyriakos Mitsotakis, ka organizuar një darkë informale me liderët e Ballkanit Perëndimor dhe vendeve anëtare të Bashkimit Europian. Sipas mediave greke mësohet se kjo darkë pritet të zhvillohet të hënën e ardhshme, më 21 gusht, në Pallatin Maximos në prani të Presidentit të Këshillit Evropian, Charles Michel dhe Presidentes së Komisionit Europian, Ursula von der Leyen.
Nga ajo çfarë thuhet në mediet vendase ftesës së Mitsotakisin i janë përgjigjur pozitivisht disa liderë të Ballkanit Perëndimor. I pranishëm në këtë darkë pritet të jetë presidenti i Serbisë, Aleksandër Vuçiç dhe ai i Malit të Zi, Jakov Milatoviç. Gjithashtu, prezent do të jetë edhe kryeministri i Maqedonisë së Veriut, Dimitar Kovaçevski, kryeministri i Kosovës Albin Kurti dhe kryetarja e Këshillit të Ministrave të Bosnjë-Hercegovinës, Borjana Kristo.
Ndërkohë, mësohet se deri më tani Shqipëria ka refuzuar ftesën e bërë nga kryeministri grek për të qenë pjesë e kësaj darke. Sipas informacioneve, Shqipëria e ftuar në nivel presidenti nuk do të përfaqësohet, ndërsa as lideri i Sllovenisë nuk ka mundur të përgjigjet pozitivisht.
Në darkë do të marrin pjesë edhe liderët e vendeve të rajonit që janë anëtare të BE-së, kryeministrat e Bullgarisë, Nikolai Denkov, Rumania Ion-Marcel Ciolacu dhe kroati Andrej Plenkoviç. Prania e këtij të fundit bëhet natyrshëm edhe më interesante për shkak të rastit të huliganëve kroatë dhe deklaratave provokuese të presidentit të Kroacisë për të cilat pati një reagim të rreptë nga Athina zyrtare ditë më parë.
Darka e Kyriakos Mitsotakis me liderët e Ballkanit Perëndimor do të fokusohet në zgjerimin dhe të ardhmen evropiane të rajonit me rastin e 20-vjetorit të Samitit BE-Ballkani Perëndimor dhe “Deklaratës së Selanikut”.
Burime qeveritare theksojnë se iniciativa e Kyriakos Mitsotakis për të ftuar liderët e Ballkanit Perëndimor dhe vendet anëtare të BE-së në një darkë joformale diskutimi mbi zgjerimin dhe të ardhmen evropiane të rajonit shënon kryesimin, rolin që Greqia luan si një shtyllë e stabilitetit, paqes dhe sigurisë energjetike në Ballkan dhe Evropën Juglindore dhe rikthimin e saj në Ballkan nga viti 2019 e në vazhdim.
