Me rastin e 35-vjetorit të publikimit të filmit klasik “Home Alone”, aktori Macaulay Culkin ka ndarë një histori të rrallë dhe pak të njohur nga prapaskenat e xhirimeve, duke surprizuar fansat që prej dekadash e identifikojnë me rolin e Kevin McCallister.
45-vjeçari ishte i ftuari i nderit në eventin “Një Natë Nostalgjike me Macaulay Culkin”, i mbajtur në Qendrën e Konventave dhe Argëtimit Long Beach në Kaliforni. Gjatë një sesioni pyetje-përgjigje me publikun, ai rrëfeu se gjatë provave për filmin, bashkë-ylli i tij Joe Pesci i njohur për rolin e hajdutit Harry e kishte kafshuar në të vërtetë në gisht.
“Ai më kafshoi gjatë provave,” tha Culkin duke qeshur. “Duhet të mbani mend që për pjesën më të madhe të filmit, unë nuk jam realisht në të njëjtin set me Joe dhe Dan (Stern). Ne xhironim në vende të ndryshme, ndaj nuk e njihja aq mirë.”
Ai shpjegoi se incidenti ndodhi nga ditët e fundit të xhirimeve, kur ai ishte ende vetëm 9 vjeç. Në atë skenë, Pesci në rolin e hajdutit kërcënon të kafshojë dhe t’i presë gishtat Kevin-it.
“Joe i tha Danit: ‘Do t’i thuash fjalët?’ Unë s’kisha një replikë aty, por u përgjigja: ‘Po, sigurisht’. Pastaj Joe tha: ‘Do t’i kafshoj këto gishta një nga një’, dhe papritur më nguli dhëmbët në gisht. Unë bëra ‘aaah!’ si një fëmijë i vogël, dhe fytyra e tij ndryshoi menjëherë kur kuptoi se sapo kishte kafshuar një nëntëvjeçar. Një koleg nëntëvjeçar! Duhej telefonuar departamenti i burimeve njerëzore,” tha ai me batutë.
Culkin shtoi se Pesci u ndje menjëherë në faj: “Ai tha, ‘më vjen keq’, dhe unë iu përgjigja: ‘Është në rregull, vetëm mos e bëj më’.”
Por surpriza më e madhe erdhi më pas: aktori zbuloi se edhe sot, pas 35 vitesh, mban një shenjë të vogël në gisht nga ajo kafshë.
“Po, më la një suvenir. Kam ende një gjurmë të vogël dhëmbi këtu. Është dhëmbi i Joe-s. Jo ai i artë… ai i zakonshmi. Tani është një histori e bukur për t’ju treguar, por atëherë ishte më shumë një moment ‘kush është ky tipi?’”
Ai shtoi me humor se në atë moshë nuk kishte as idenë se kush ishte Joe Pesci: “Nuk e kisha parë fare ‘Raging Bull’. Nuk e dija se me kë po kisha të bëja.”
Kur u pyet nëse e kishte menduar ndonjëherë hakmarrjen, Culkin pranoi se ideja i kishte kaluar në mendje:
“E kam menduar pak. Ai luan golf me një fqinjin tim dhe sa herë më thonë ‘po vjen Joe’, unë them ‘po, po’. Vetëm më trokisni në derë dhe gjithçka do shkojë mirë,” tha ai duke mbyllur bisedën me humor.
