Kryetarja e LSI-së Monika Kryemadhi ka reaguar pas përgjimeve të disa eksponentëve të PS me persona të inkriminuar para zgjedhjeve të 2017, të publikuara sot nga gazeta gjermane “Bild”. Në një postim në “Facebook”, Kryemadhi shkruan se këto fakte i vënë vulën tjetërsimit të votës nga krimi për llogari të Rilindjes, ndërsa publikon një foto të kryeministrit Edi Rama, sipas saj me ‘stafin’ e tij elektoral në Durrës. Ndaj Kryemadhi thotë se është e qartë se krimi i organizuar është ulur këmbëkryq në kutitë e votimit, parlament, në karrigen e kryeministrit e qeveri. Ajo thekson se dorëheqja është e vetmja rrugëdalje e Ramës.
POSTIMI I PLOTË
Faktet e bëra publike nga gazeta gjermane ‘Bild’, i vënë vulën tjetërsimit të votës nga krimi i organizuar për llogari të Rilindjes. Këto fakte janë vetën një pjesë e puzzle-it gjigand të bashkëpunimit të krimit të organizuar me zyrtarët e Rilindjes, të të gjitha niveleve.
Unë kam denoncuar publikisht me fakte, që në tetor të 2017, lidhje të tjera të elementëve kriminalë direkt me Edi Ramën. Në fotografi mund të shikoni Edin të rrethuar nga “stafi” i tij elektoral në qarkun e Durrësit. Këto incizime nuk janë rastësi, as të vetmet prova për tjetërsimin e votës së shqiptarëve. Ato shtrihen kudo nga Jugu në Veri. Nga Shkodra në Dibër. Nga Elbasani në Lezhë. Nga Vlora në Berat. Nga Tirana në Fier. Kudo në të gjithë Shqipërinë.
Për çdo shqiptar është më se e qartë: Krimi i organizuar është ulur këmbëkryq në kutitë e votimit, në Parlament, në karrigen e Kryeministrit, në qeveri.
Zgjedhjet, Parlamenti, Kryeministri dhe Qeveria janë ilegjitime. Koha e këtij Kryeministri ka mbaruar! Dorëheqja është e vetmja rrugëdalje e tij. Popullin nuk e ndal dot askush të thotë sot fjalën e tij dhe t’i rikthejë legjitimitetin zgjedhjeve, parlamentit, qeverisë, që sot janë marrë peng nga bandat e Rilindjes. Asnjë hap pas!
