“S’ka shanse Edi Rama, sikur të mbledhi gjithë superfuqitë e botës, nuk del dot forcë e parë”. Kështu deklaroi sot kryetarja e LSI, Monika Kryemadhi, e cila vazhdon t’i mëshojë qëndrimit të saj se PS do të dalë forcë e tretë ose e katërt.
“Ndalimi i koalicioneve ka qenë gjithmonë qëllimi Ramës. Por po ja u bëj të qartë, s’ka shanse Edi Rama, sikur të mbledhi gjithë superfuqitë e botës, nuk del dot forcë e parë. Rama sot diskuton vendin e 3-të dhe të 4-t. Mos shikoni vetëm sondazhet e rrjeteve sociale. 15% e shqiptarëve përdor internet, dhe janë ata që janë në administratë publike që kanë të ardhura mbi 50 mijë lekë”, u shpreh ajo në News 24. Kryetarja e LSI tha se Rama po bën ndryshime kushtetuese dhe po ndërhyn te koalicionet, pasi sipas saj ka një panik të përbrendshëm.
“Është një veprim në panik, pra ka një panik të përbrendshëm. Nëse një njeri do të ndihet i sigurt dhe i fortë, s’ka pse ndërhyn në një proces kaq korruptiv, por është një veprim që tregon pasiguri.Më kënaq veprimtaria e Ramës që tregon se është i frikësuar. Çdo ditë që kërcet këmbët tregon që rezultate e zgjedhjeve të ardhshme nuk e ndalojnë dot rotacionin që do të vijë me zgjedhje të lira e të ndershme.
Politikisht do të thoja le ta bëjnë sepse do të kemi kënaqësinë më të madhe për të treguar në të ardhmen shqiptarët për të treguar shembullin e njerëzve që marrin peng dhe që do të kenë shpagimin dhe dënimin për këto veprime, por nga ana tjetër do të më vinte keq pasi një veprim do ta çonte Shqipërinë në një drejtim të paditur”, theksoi Kryemadhi.
