Ka mbërritur rreth orës 11:00 të paradites së kësaj të hënë në gjykatën e Vlorës, autori i masakrës me 8 viktima të ndodhur tre ditë më parë në Selenicë të Vlorës.
Ritvan Zykaj, 24-vjeçari që tronditi opinionin publik pas ekzekutimit me kallashnikov të kushërinjve të tij, do të njihet sot me masën e sigurisë.
Në sallën e gjyqit ai ka qëndruar i heshtur duke mos iu përgjigjur pyetjes së përse e kreu krimin, ndërsa nuk ka nguruar t’i shohë në sy të gjithë të pranishmit.
Po ashtu raportohet se ai nuk është shoqëruar nga asnjë familjarë, të cilët menjëherë pas krimit të tij, janë larguar nga fshati.
Pas refuzimit të të gjithë avokatëve për ta marrë përsipër këtë rast, është caktuar avokati nga shteti, Gentian Leka, ndërsa Prokuror është caktuar Saimir Smaka dhe gjyqtare Esmerilda Habilaj.
Seanca ende nuk ka nisur pasi avokati nuk ka mbërritur në Gjykatë, ndërsa pritet të paraqitet në minutat në vijim, dhe pritet që seanca të zhvillohet me dyer të mbyllur.
